Sabaidee Freunde


A dere Stell mau grad es Sorry an üser fliissige Mitläser!

Mir hei i de letzte paar Wuche chlei es strängs Programm gha und wenn mir mau zit hätti gha zum blogge, hei mir üs am Alkohol und angerne Substanze ergäh.

Mir versueche die letzte 2 Monate somit so guet, churz und blitze wie möglech zämezfasse.
I de letzte Monate vo üsere Reis gäh mir üs usserdäm die grössti Müeh, wider e biz regelmässiger z'blogge.

Fasch 2 Länder hei mir sit üsem letzte Läbeszeiche dürquert und si mittlerwiile mit Laos scho fasch am ändi (vo Asie) acho.
Mir si im Momänt in Luang Prabang, dr vorerst letzte Stadt bevors de witter nach Malaysia geit.


Föi mir aber doch grad mau dert ah wo mir bim letzte mau ufghört hei, Ninh Binh (Zentralvietnam)

S'liecht rägnerische Ninh Binh het üs trotz allne Wätterumständ no drzue chönne motiviere, e wittere vo dene
mittlerwiile 100 Tagesusflüg z'mache. Mit em Privattaxi (Offroad-Driver vom Hotel) hei mir üs in örtlech Nationalpark
vo Ninh Binh begäh. Die asiatischi bequemlechkeit het sech ou hie widermau bemerkbar gmacht. Mir si i de 2 Höhle
wo mr si go erforsche (hier Witz einfügen) nämlech fasch die einzige Lüt gsi. S'Schöne a dene 2 Bunker isch scho mau
d'Tatsach gsi, das die Dinger nid wie in China bis zum letzte Meter usglüchtet si, sondern das me säuber, mit Helmlampe
mues uf entdeckigsreis gah. Das het üs scho mau derzue veralasst ir mitti vor Höhli d'Liechter abzschalte um e halbi Schuelklass
so richtig z'erschrecke....hä hä.

Dr räst vom Nationalpark isch sehr schön gsi und het alles in allem en unberüehrte iidruck gmacht.

Witter isches de mit em Jeep ane Hafe gange, wo mir mit em ne Wildfrömde Typ hei dörfe go Boot fahre.
Mir si üs bis hüt nid ganz sicher ob das e Teil vor Tour isch gsi oder ob üse Fahrer eifach schnäu chlei Gäld
i die eigeti Täsche het weue stecke. Aber egal, mir hei e schöni Bootstour dörfe gniesse und ir Mitti vor Strecki sogar
mau säuber as Stüür dörfe. Isch no schwirig sone Tanker z'stüüre.

Ir mitti Vor tour het üs dr Boots-Brudi de für Fottis z'mache ufere einsame Insle abglade. D'Tatsach das er
nach Akunft grad mau is nirgendwo verschwunde isch het üs im erste Moment chlei stutzig gmacht, aber hei,
s'Boot hei mr no bi üs gha u Bootfahre hei zu däm Ziitpunkt ja ou beidi chönne.

Da me in Ninh Binh bi mittelmässigem Wätter ou nid viu meh cha mache, hei mir üs entschide, am nächste
Tag nach Dong Hoi, Hoi Gong, Hoi Dong oder was ou immer dr Sti het weue liire, ufzbräche.


Mit em Zug isches am früehne Morge ine witeri Stadt gange. Während dr Fahrt hei mir die symphatischi Christel us Dütschland
dörfe kenne lehre und hei zäme beschlosse doch die witere Täg no gmeinsam z'verbringe.

In Dong Hoi si mir am gliiche Tag is wahrschinlech günstigste Hotel bis ize iiquartiert worde.
Mit 2$ pro nacht für 2 Persone, hei mir üses Budget massiv chönne schone. Wär da nid geng dä blödi Alkohl gsi.

Aus hätte mir nid scho gnueg Höhle gseh, hei mir wägem Sti aka dem Höhlenforscher, no 2 witteri Bunker müesse go aluege.
Die einti Höhli isch aber de doch unglaublech beiidruckend gsi, mit 36 Kilometer Längi und em ne übergang zu Laos, ische das die 2t-Grössti
Höhli in Vietnam. I die grössti hei mir leider nid inedörfe. Üsi Erfahrige chöit dir ou uf Tripadvisor nacheläse, da mir vo üsem
Tourguide zwunge si worde, doch es paar gueti Wort für ihn z'hingerlah. Na ja, är het de sis review grad mau säuber gschribe nachdäm
mir nid würklech bock hei gha. Offesichtlech louft das in Vietnam chlei eso :)

Mit nur 2 Täg in Dong Hoi hets de für witteri Abentüür nümme glängt. So si mir de es witters mau mit em üsserst komfortable Zug
nach HUE (hue hue hue) ufbroche.


Mit dr Christel im Gepäck si mir ou in Hue e wittere vo dene unzählige Tempel go aluege, hei üs aber de nach churzer Zit druf geiniget
das mir nach so viu Tempel, Kloster, Pagode mittlerwiile d'Schnauze e biz voll hei und mir doch lieber göi go Bier suufe a d'Promenade.

Mit em Gedanke mau öppis angers z'erläbe isch üs de in Sinn cho, das es in Hue aagäblech en verlassnige Wasserpark git.
Offebar hei sälbst die iiheimische nid würk ahnig das dä no neume umesteit, so hets de während dr Taxifahrt e biz Navigationsgschick
vo üsere Site här brucht.

Am Iigang hei mir trotz gschlossnigem Park en Iitrit müesse / seue / weue zahle.
Es isch eso, das sech dert en Iiheimische (wo mit em Park nüt z'tüe het) vore Iigang het gstellt und mau versuecht het,
d'Bsuecher um e chli Gält z'erliechtere - super Gschäftsidee :)

Dr Park sälber isch dr Wahnsinn, es isch üs allerdings vom erste Meter ah klar worde wieso dä Ort nur knapp es halbs Jahr überläbt het.
Die unzählige Wasserrutschene (4 Stück) si z'Fuess knapp 600 Meter vom ne Sinnlose Ussichtspunkt und witteri 500 Meter vore Art
Aquarium resp. are Arena für Delphine, Krokodilshows entfernt gsi. D'Christel, vo Bruef Architektin, het sech glaub mehrmals fragend
a Chopf müesse länge über d'Art wie die Lüt dä Park baut hei.

Fun-Fact: D'Krokodil vom Wasserpark hei bis vor knapp 1 Jahr no im verlassnige Park gläbt.
En ehrleche Australier het de schiins die Tier churz drufabe vorem Verhungere grettet.


Alles in allem, es ziemlechs Highlight und e gfundni Abwächlig zu all dene Tempel.

A üsem letzte Tag hei mir üs während em Transfer nach Hoi An no für ne churze Trip
zu 6 Wasserfäll entschide. Vor em Ufbruch het üs dr Fahrer drufhigwise, das mir unbedingt
Moskitospray seue mitnäh. Vom nahezue sälbstmörderische Trail zu de Wasserfäll het är aber nüt erwähnt.

So si mir während knapp 4 Stunde mit em ne durchschnittleche Puls vo 180 im strömende Räge zu de Wasserfäll klätteret.
Öppis guets het die ganzi Sach ämu daher gha, das es ufem ganze Wäg kei einzige Tourist oder Iiheimische gha het.
Chunnt wahrschiinlech daher, das alli andere eher Pro-Life si und üses "Leben am Limit" Motto nid würk teile.


Da mir mit dr Christel üses Reisetempo e biz gsteigeret hei, isches de ou churz drufabe scho witergange mit......


.....Hoi An. Ere schöne und sehr ruehige Stadt mit ere gmüetleche Fluss-Promenade mit chline Bars und Kafis.
Da gwüssi Teile vor Stadt Autofrei si het sech ou s'Chaos eher in Gränze ghalte und me het aus Fuessgänger vili freiheite
und chlei weniger Angst en Unfall z'Provoziere. S'Sightseeing hei mir wider e biz zrugggschruubet und si mehrheitlech
i de Kafis und Bars umeghanget. Dr Sti, da er nie cha ruehig hocke, het de a 2 Täg doch no es Velo gmietet und isch
chlei d'Stadt go erkunde. S'Wätter säuber het trotz Strand nid zum Bade iiglade u mir hei churz drufabe beschlosse das mir wider mau
chlei Sunne, Hitze und meh Strand nötig hei. Da Lat hei mir somit us üsne Plän gstriche und si mit em Flüüger direkt uf Phu Quoc,
ere chliine, gmüetleche Insle ar Gränze vo Kambodscha greiset.


Mir hei für Phu Quoc beschlosse, da es uf dr Insle selber nid würklech viu z'tüe git, üs wider mau chlei im ne luxuriösere Bunker
iizmiete u hei üs de churz mau fürs "Daisy Resort" entschide wo mir meh oder weniger die nächste 5 Täg zwüsche Bar, Pool und Ligestüehl hei gwächslet.

Es Highlight vom Resort isch aber definitiv s'Personal. Klar, für dä Priis cha me ja es vornähms und sehr nätts Personal erwarte, aber das wo mir erläbt
hei isch also beyond great gsi wie d'Evelyne würd säge.

Am dritte Abe vo üsem Ufenthalt si mir am früehne Namitag drufhiigwise worde, das de s'Restaurant vom Hotel etc. zue sigi da s'Personal es Firmefest heigi
u somit vili nid am bügle sige. Mit em ne Nicke hei mir das zur Kenntniss gno u hei eigentlech nümme viu drbi dänkt.......5 Minute später si mir,
us bis hüt unerklärleche Gründ, aus die 2 einzige nid-Vietnamese ou zu däm Fest iiglade gsi. Steuet nech doch eifach churz e Tisch mit knapp 50
Vietnamese und üs zwöine Holzchöpf vor.......herrlech :)


Gäge d'Nacht zue u nachdäm dr Sti und ig natürlech no grad schön mau 2 Priise vor Huuseigene Tombola hei abgruumt, het sech de die verastaltig langsam ufglöst
u mir si mit de coole und junge Kids vom Resort no in hingerst Egge vo dere Insle go Karaoke singe.......oder heis z'mingscht probiert. Alkohol, Heiserkeit
und falschi Töön hei dä Abe / die Nacht perfekt abgrundet.

Kei Ahnig wie mirs immer mou wider schaffe i so öppis inezlauere, aber das isch bis dato öppe s'beste Hotelerlebnis gsi uf üsere Reis.


S'Zuesatzzückerli: Mir si (wider aus die 2 einzige Whities) mit dr Crew no 2 mau go Fuessball spile.......ungloublech :)


Wo mir am Personal vo üsem nächste Ziel, Saigon (Ho-Chi-Minh-Stadt) verzeut hei, isch üs nur gseit worde, dass das de
es ziemlechs Abentüür wärdi si. Ufgrund vom Chinesische Neujahr (TET-Holidays) stöing nämlech s'ganze Land still und es
sigi scho es Wunder wenn mir vom Flughafe es Taxi finde wo üs i d'Innestadt wärdi bringe.

S'Chinesische Neujahr ungerscheidet sech daher vo üsem, das d'Asiate die Ferietäg vor allem deheime und mit ihrer Familie
verbringe u somit mit Party uf dr Strass oder langi Club-Nächt grad gar nid existänt si.


Wo mir de in Saigon si acho und zwüsche guet 200 Taxis hei chönne uswähle, isch üs de klar worde das die guete Lüt uf dr
Insle wohl nümme ganz gwüsst hei wie das Neujahrsfest ir Stadt mittlerwiile so usgseht. In Saigon si d'Strasse überfüllt mit Lüt
und d'Bars und Clubs schiine gar nie weue z'schliesse. S'einzig blöde, i jedem Lade und jedem Restaurant gits automatisch
en 15% TET-Holiday zueschlag uf jedi Rächnig. Da cha en Biertränkte Abe scho mau chlei is Gäut go.


Um ou s'kulturelle Programm nid z'vernachlässige hei mir üs de no en Tag Zit gno und sis Vietnam-Chriegsmuseum go aluege.
Es grosses Museum wo mir aber nach nid allzu langer Zit scho wider verlah hei, da d'Bilder und die ganze Usstellige leider
sehr ufe Mage und uf d'Tränedrüese drücke. Dr Tag isch für üs nach dere Erfahrig ämu gloffe gsi und es hei sech gwüssi Depressione
breit gmacht.

Viu meh gits zu Saigon nid z'säge. Wär weis wie en Grossstadt usgseht het Saigon meh oder weniger ou scho gseh.


Mit em Sti sire thailändische Kollegin (Pui) im Gepäck hei mir de Saigon und somit ou Vietnam nach knapp 1,5 Monate verlah
und si witer in Richtig Kambodscha, i d'Hauptstadt Phnom Penh go luege wies usgseht.



Chomreabsuor Kampuchea!



Phnom Penh hei mir vor allem wäge de berüehmte Killing Fields und dr Gschicht vor rote Khmer weue bsueche.


Dr Sti het sim Name aus Tourguide alli Ehr gmacht und üs in Phnom Penh im ne super Rotlichtviertel iiparkiert.
Vo üsem Hoteliigang us hei mir wunderbar chönne zueluege wie Herre so um die 60+, im Minutetakt ir Lobby unge
jungi Escort Dame ufs Zimmer si cho abhole. Zum glück si üser Zimmerwänd einigermasse guet isoliert gsi ;)


Mit em Tuk Tuk isches am nächste Morge zu Tuol Sleng (das isch die ehemaligi Schuel wo die Rote Khmer aus Foltergfängniss gnutzt hei)
und nach Choeung Ek oder äbe bekannt ungerem Name "Killing Fields" gange. Mir erspare nech hie üser Erfahrige z'beschribe und löi e
churze Wikipedia Abschnitt für üs la rede;

"Um Munition zu sparen, wurden die Todgeweihten in diesem Exekutionszentrum nicht erschossen, sondern mit Eisenstangen,
Äxten oder ähnlichem erschlagen. Kinder wurden gegen Bäume geschlagen, bis sie tot waren. Die Toten wurden in Massengräbern verscharrt,
die auch heute noch deutlich sichtbar auf dem Gelände vorhanden sind. Durch starken Regen und Erosion kommen immer noch Kleidung und Knochenreste
aus dem Boden, die von den Mitarbeitern der Gedenkstätte alle zwei bis drei Monate eingesammelt werden.

Da teilweise mehr Leute pro Tag ankamen, als getötet werden konnten, wurden die Leute temporär in einem „Warteraum“ eingesperrt.
Damit die auf ihren Tod wartenden Leute die Schreie der Sterbenden nicht hören konnten, wurde die Anlage mit Musik beschallt."


Für lüt mit starche Närve und em ne guete Mage isch dä Usflug allerdings trotzdem sehr Empfehlenswert.
Dank de Gratis Audioguides erfahrt me sehr viu über d'Vor- und Nachchriegsgschicht vo däm dunkle Kapitel für Kambodscha.


Mir hei nid so rächt gwüsst wie mir a dere Stell vom Blog zu ere eher witzige Gschicht wei überleite, daher gits hie
doch mau es chlises Highlight, nämlech d'Aakunft vom Flani (aka Forest)! Är het üs de während knapp 4 Wuche dür Kambodscha und Laos begleitet.



Interlude: Wie finde ich ein Handy in Kambodscha?


Nach ere durchzechte nacht mit Karaoke het d'Pui ir letzte Bar gmerkt das irgendwie ires Handy
wäg isch. Nach mehrmaligem Wäg hin und zrugg ablouffe, lüt Frage etc. hei mir üs de drmit abgfunde, dass das Grät wohl für immer wäg isch.

Aus letzte Versuech het üse Hobby-Informatiker (ja, dr Sti) mit em IPhone-Finder versuecht s'Natel irgendwie z'lokalisiere.
Und siehe da, das Teil isch offebar irgendwo zwüsche üsem Hotel und ere Bar gsi. Dr Sti het de us verzwiflig mau e Nachricht
ufs Natel vor Pui gschickt und.........tatataaaaa churz drufabe het sech de en ehrleche Finder telefonisch gmäudet.

Allerdings het dä Brudi grad mau flot 200$ für das Grät weue gseh. Dr Sti aus knallharte Verhandligspartner het de dr Priis grad mau uf 100$ abedrückt.
Beidi Parteie si uf das Aagebot iigange und es paar Minute später isch de ou scho es Tuk Tuk mit em besagte Finder häregrollt.

Ehrlech wie er isch gsi, het er dr Sti de bittet doch mit ihm mitzcho so das si zäme das vermisste Handy chöi go abhole.
Da dr Sti sowohl a sim Gäut aus ou a sine Organ / sim Läbe sehr hanget, hei mir ihm de z'verstah gäh dass das nid so e gueti Idee
sigi und dä Penner ize das Natel seu go hole und dahäre bringe.

Ohni grossi Widerred het de ou das klappet und nach etleche Stunde vor ungwüssheit hei mir sowohl s'Natel aus ou e wunderbari Anekdote
für üse Ufenthalt in Phnom Penh gha.

Sti, bim nächste Job Interview chasch zur Frag nach dine IT-Skills
eifach säge du heigisch es scheiss Natel im verfluechte Phnom Penh gfunge u dä Poste isch dr uf sicher :)


Mit all üsne Wärtsache si mir nach 1 Wuche Phnom Penh nach Kep ufbroche wo mir, dank am Flani, üses Reisetempo wider
e biz hei müesse steigere.


Kep isch es gmüetlechs Kaff im Süde vo Kambodscha wo sech vor allem dür s'eher langsame Alltagsläbe uszeichnet.
Bim Rusty, em ne ziemli versiffte Franzos so um die 50gi ume, hei mir 3 Täg gnosse u heis tatsächlech s'erste mau uf üsere Reis, am
zwöite Abe fertig bracht, fsch siner ganze Bierresärve wäg z'suffe. Me merkt das dr Flani bi üsere Truppe drbi isch gsi.

Dr Kulturell Teil hei mir dermit erfüllt, das mir z'Fuess en ungloubleche Wasserfall si go aluege.
Oder eifach, es isch en trochne Tümpel gsi wo lut de Iiheimische knapp 3 Wuche im Jahr Wasser fliesst.

Zmingscht hei mir üs dra chönne erfröie das mir a däm Tag chlei Sport hei gmacht.

Zu Kep und ou zu de folgende Stättli in Kambodscha gits nid allzuviu z'säge, da üser Ufenthält jewiils nur vo sehr churzer Duur si gsi.


E biz relaxe het natürlech ou no müesse si und so si mir vo Kep us churz drufabe nach Sihanoukville witter.
Sihanoukville isch so chlei dr Ort wie me ne sech vorstellt wes heisst, das es mehrheitlech Touriste dert het.

Western-Style Bars und die einti oder anderi Party-Möglechkeit. Ir Psy-Bar und dr drzueghörige Apothek, em Psy-Shop,
bechunnt me so ziemli aues das was me erwartet wenn me dä Name list. E Liste mit de Artikle erspare mir öich :)

S'Highlight in Sihanoukville isch träffe vor Nicole (Nics) und ar Debbe (Hadi) gsi. Mir hei üs für ne churze Moment
wie im Buechibärg zrugg gfüehlt. Ussert villech d'Pui wo haut nid immer alles mitbecho het wenn sech 5 schwiizer ungerenander
ustuusche. Mir hei üs aber immer grössti müeh gäh ou Thai...änglisch unterenander z'rede.

Das churze Meet and Greet isch de ou scho wider verbi gsi und mir (Pui, Flani, Sti, Tobi) si nach Koh Kong und
die 2 Fraue nach Phnom Penh witterzoge.


In Koh Kong hei mir widermau e 2 Tages-Trek absolviert und hei üs düre Dschungel zu es paar Wasserfäll kämpft.
Die Wasserfäll si so toll gsi das sogar die 2 "Wasserfäll-hei-mr-mittlerwiile-gnue-gseh" Type no chlei hei dörfe Stuune.

In Koh Kong si mir abar nur 2 Tag gsi und si nach em Trek direkt nach Siem Reap witter.


Siem Reap, wo wohl jedem wäge Angkor Wat (Turn down for Wat!) sicher en begriff isch, isch haut es witters Touri-Käffli wo vorallem eifach
als Transfer i die Wältberüehmti Tempelstadt dient. Ir ganze Stadt chame Toure und alles Mögleche wo s'Touristehärz begehrt
bueche.

Mit dr vorahnig und em Aschiss, die ganze Touris in Angor Wat müesse z'erträge, si mir auso am früeche Morge zu dene Ortschafte
ufbroche. Dr Flani, no immer chlei verunsicheret wäge dr Fahrtüchtigkeit vo dene Tuk Tuk, isch gloub froh gsi wo mr nach wenige
Kilometer scho si acho. En MFK / TÜV gits in Kambodscha nid oder?

In Angkor acho si mir positiv überrascht gsi, das es vor allem eis nid gha het......Touris!
Wie mir das ou immer gschafft hei, si mir wohl zuefälligerwiis zum ne sehr günstige Zitpunkt derte gsi und hei die unvorstellbar grossi
und imposanti Tempelaalag fasch elei chönne besichtige. Wie dir sicher uf Facebook scho heit chönne entnäh, isch dä Tag es absoluts
Highlight uf üsere Reis gsi.


Und wüsset dr was?


......Nics und Hadi hei mir ou no einisch gseh und hei üs a ihrem letzte Abe, zäme, ire (halbseriöse) Bar so richtig schön abgschosse :)


Isch das alles?

Natürlech nid! Wies dr Zuefall so wott, isch üse Aussie-Homie und Uswanderer, dr Binzo mit sire Frou ou no in Siem Reap gsi.
A üsem letzte Abe si mir, dank em Binz, alli zäme e Zirkusuffüehrig go aluege. Wär ize dänkt, bah, Zirkus, so ein blödsinn, dä
isch no nie im ne Kambodschanische Zirkus gsi.

Dr Verein oder die Stiftig wo dr Zirkus füehrt, agiert als Hilfswärch für Strassechinder und sorgt drfür das d'Chind vor Strass
wägchöme um es würdigs läbe chönne z'füehre. D'Artiste si alles Waise- oder Strassechinder.

D'Uffüehrig isch vo däm här sehr toll, da es im gägesatz zu üsem Zirkus, hie meh drum geit das d'Artiste e bestimmti Gschicht
(i üsem Fall; die vor Rote Khmer) nachestelle und sech drbi nur an Musig, Mimik und glägentleche Bilder orientiere.

Mir (eigentlech Zirkushasser) lege öich die Uffüehrig as Härz, Das isch genial gsi!


Binz and Michelle.......see you in Brissy! :)


Mit starch reduzierter Gruppe (falls dr nümme chöit folge, es si wider 4 Lüt) hei mir Kambodscha nach fasch 1 Monat verlah und hei üs schliichend uf Laos verzoge.



Sabaidee Laos



Agfange hei mir mit Don Det, es Hippie-Dörfli mitz i de berüehmte 4000 Islands.
Usser Gras, Strand, und ere gmüetleche Velotour zure Hanfplantage wo wohl irgendwo ir nächi isch gsi, het Don Det
nid würklech viu z'biete.

Wenn ihr's ruhig und langsam mögt, Don Det ist euer Inselchen.


Im Stächschritt richtig Pakse hei mir, im ne wittere chliie Stättli, 1-2 Täg verbracht und si mit es paar Miet-Roller
zum ne wunderbare (ja, är isch würk toll gsi) Wasserfall gfahre.


S'Rückflugdatum füre Flani isch immer wie nächer grückt und so si mir de churz drufabe scho nach Vieng Kham witerzoge,
wo mir üs für die bekannti Kong Lor Cave hei chönne begeistere. Eigentlech wäri plant gsi, die Höhli grad in eire Tour mit
em Bus vo Pakse us z'mache. Da aber, entgäge dr Ussag vom Reisebüro, d'Fahrt statt 6, ganzi 11 Stunde duuret het, si mir
am spätere Abe in Vieng Kham bliibe hocke und hei üs fürs nächstbeste Guesthouse müesse entscheide. Chunnt drzue, das üse
Busfahrer ungerwegs nid weniger aus 2 mau d'Polizei het müesse bestäche, da die Ware wo mir zuesätzlech im Bus hei gha, wohl nid ganz suuber si gsi.

S'Guesthouse in Vieng Kham het vor allem dadüre glänzt, das die ganzi Belegschaft düre Tag nüt angers het gmacht aus sech abzschiesse und
sech d'Biire zue z'Kiffe (inkl. üsem Fahrer wo üs am nächste Tag für ne viu z'höche Priis zur Höhli gfahre het)

Üse Fahrer het vor dr Fahrt zum Glück no churz Bättet, de cha ämu de sicher nüt schiefgah. Säubst wenn är fahrt wie ne gstörte.


Da d'Zit immer knapper isch worde füre Flani, si mir de en Tag vor sire Abreis i d'Hauptstadt vo Laos, Vientiane ufegfahre.
Dasmau mit em ne suubere bus und ohni grosse Komplikatione.

In Vientiane hets de bines paar Bier gheisse, abschid näh.
So isch dr Flani nach fasch 4 Wuche, läbändig i die chalti Schwiiz zrugggfloge.


Flani, falls du das lisisch, mir hei e super Zit gha, schön bisch üs cho bsueche!


Wie dir merket, wärde mir langsam schriibmüed u mir wärde wägedäm s'Buech wider für es paar Täg (versproche, Täg!) schliesse.


Vo Luang Prabang us geits de, wie ir Iileitig bereits erwähnt, usserplanmässig nach Malaysia wo mir für öich natürlech
witter fliisig Anekdote füre Blog wärde sammle.


Mir hoffe ihr bliibet üs treu und heit witerhin viu freud am läse!


So long......euchi 2 Superfründe

Sti & Tobi




Xin chao tat ca lai voi nhau!


Mir si mittlerwiile in Vietnam acho und hei üs scho dür Hanoi (juhui), Sa Pa (brrrr), Halong Bay (Hallo, ist da wer?) kämpft.

Agfange mit Vietnam hei mir in Hanoi, ir Hauptstadt im Norde. Mit de Emirates hei mir mitti Dezember 2016 en üsserscht
komfortable und riibigslose Flug vo Yangon us gstartet. Am spätere Namitag in Hanoi acho, isches zersch mau richtig Hotel gange.


Dr Sti het üs, wie sechs i de Hauptstädt mittlerwiile ghört, mitts im Busfahrer-Viertel parkiert.
Sehr schöns Hotel, aber links, rächts, vore, obe u sogar unge hets vo Bars nur so gwimmlet.

Isch e krasse Kontrast gsi, da mir vorher in Myanmar sit 3 Wuche kener Bars und Clubs me gseh hei.


I ha grad dr Sti gfragt was mir in Hanoi so gmacht hei ussert üs permanent lo voulouffe, u was i de so i dä Blog seu schribe.

Na ja fründe......Mir hei während knapp 10 Täg in Hanoi würk nid viu angers gmacht :)


D'Altstadt, wo mir üsi Residenz hei gha, isch gfüllt mit Bars und chliine Cafés wo mir während mehrerne Täg hei unsicher gmacht.
Denn schliesslech hei mir nach fasch 3 Wuche non stop sightseeing und trekking in Myanmar, mau chlei abwächslig bruucht.

Vo Hanoi gits eigentlech nid allzu viu z'verzelle. Ir Altstadt chöi mir euch s' "Beercraft" empfähle. Diversi Sorte, früsch zapfti Bier
und en Wahnsinns Burger zum ungerlegge. Kafi füre Kater am Morge gits entweder im Young Coffee oder im Kafi-Egge wo mir dr Name leider vergässe hei.

Empfählige schüsch zum Usgang gits kener grosse. Probieret die blöde, mit Lachgas gfüllte Ballons nid - gäbe nur übelst Gringweh.


Nach 6 dürzechte Täg und Nächt in Hanoi, hei mir wider öppis für üse Körper müesse mache und si nach Wiehnachte uf Sa Pa ufbroche.
Mit em Nachtbus isches also am spätere Abe in richtig höche Norde ufegange. Dr Tobi, usgrüstet mit Badehose und T-Shirt, het de nach
8 Stund Busfahrt grad mau chlei herti Nipple becho, da dr Temperaturunterschied zu Hanoi ca. 15 Grad gäge abe betreit het :)

Alles keis Problem, mir si ja am 06:00 Uhr im Hostel u chöi üs de ir Lobby no chlei ufwärme.
Blöderwiis isch die Lobby im freie usse gsi. So hei mir üsi Zit bis zum check-inn im ne örtleche Kafi verbracht.

Am druffolgende Tag hei mir d'Altstadt - für Touriste: "Old Village" gnennt, besichtigt.
Die ganzi Altstadt isch vor allem uf Touriste usgleit, denn vo de Hüser isch ussert de hunderte Souveniershops nid würk viu übrig.

E iidrucksvolle Wasserfall, Riisfälder mit de dazueghörige Bewässerigsaalage hei üse churz abstächer i das Village abgrundet.


Am abe hei mir üs mau chlei i de örtleche Bars umgluegt. Da mir definitiv ir näbe(l)saison dert obe si gsi, isch ussert 1-2 offne
Bars mit je 2-3 Touriste und / oder iiheimische drinn, nid würk viu los gsi. Nach närvezerfleischende Rundine JENGA EXTREME! (Tobi 10, Sti: 0)
und Poolbillard (Sti: 10, Tobi: scho z'betrunke) hets de plötzlech dusse no afa schneie. Mir hätte auso mit allem grächnet, aber nid das mir
i däm Jahr no mau Schnee gseh. Zum Glück het üsi Bar sogar Glüehwii serviert u het üs so gholfe no chlei schwiizer Après-Ski Stimmig in Vietnam dörfe z'erläbe :)

E Tag später isches mit em ne liechte Kater uf en Fansipan (Fancy-Pants) Mountain gange. Ufelauffe hätti 3 Tag duuret u drum hei mir üs de relativ schnäu mau für die 20 Minütigi Gondelfahrt entschide. Ersch im Summer 2016 erbaut, hei mir mit ere Top-Moderne Gondle uf dä
3143 Müm. höche Bärg ufe chönne. Während dr Gondelfahrt e biz apisst, dass es ussert Näbel nüt z'gseh git , hei mirs mit viu glück i de letzte Höhemeter de no knapp über d'Näbeldechi gschafft. D'Off-Season het sech sowohl während dr Gondelfahrt (ganz ellei) als ou ufem Bärg sälber, bemerkbar gmacht (knapp 20 Persone, drunger 2 Jet-Set Mönche :).

Dr ganz Bärg wird ersch sit knapp 1 Jahr Touriste tauglich gmacht, u so hets näbe 100 Baustelle ufem Bärg obe eigentlech ou nid viu meh aus die puuri Natur und en atemberaubende Usblick über 360 Grad Sa Pa und Umgäbig gäh.

Sa Pa sälber wird üs vorallem in Erinnerig blibe wius aaaaarschkalt isch gsi. Dusse ca. 5 Grad und im Hotel / Hostel wäge fählender Heizig
und schlächter Isolation no grad einisch glich wenig. Do fallt eim s'Ufstah am Morge grad no einisch chlei schwerer :)



Hanoingover Part 2
""""""""""""""""""""


Am 30. Dezember hei mir Sa Pa verlah und si wider nach Hanoi zrugg um s'neue Jahr in Empfang z'näh.
Mit em bisher best Nachtbus (Bett, ja verdammt, es Bett!) hei mir d'Rückfahrt aträtte und si am späte Abe wider ir Hauptstadt acho.

Da dr Tobi Sti bir Hotelbuechig "Ankuft früh am Morgen" het agäh, isch de dummerwiis üses Hotel scho wäg gsi. Well done!
Zum Glück het üse Hotel-Brudi no auf die schnelle es Ersatzhotel für die aktuelli Nacht gfunde.


Silvester steht vor der Tür!


Am Silvester hei mir üs d'Müeh gmacht es restaurant z'finde wo üs es traditionelle Fondue-Chinoise zum 31.12. serviert und
das ganze sogar ou no im ne Hingerhof vom ne Belgier gfunde. Mit Gänseläbere, viu guetem Fleisch u no viu meh Bier,
hei mir gäge die 21:00 scho s'erschte Mau gjammeret das es doch ändlech 12i seu wärde das mr hei chöi (Starkbier ist stärker als Bier).

Nach ere flotte Rächnig vo 3.5 Millione Höger (mir heis ja) si mir de doch no i d'Stadtmitti füre grollet, wos näbe ere Riiiisige Heineken Stage
und gfüehlt 1 Million Menschen, alles het gäh, ussert Bier. Üses Glück hei mir de bim ne Strasseverchäuffer gfunde wo mir ihm Grad mau die ganzi Ration an Alkohol hei wäggsoffe. *Happy New Year* hets glütte u dr Sti isch scho mau nienemeh gsi. Gueti Idee wenn me i soviu Lüt inne grad mau 30 Minute vor Neujahr no wot go pisse.


Nach mehrerne Stund si mr aber de doch wider vereint gsi u si witter und witter und witter zoge...........


Dr Räst si Details, Chopfweh hei am nächst Morge resp. Namitag ämu beid gha :)



Halong Bay - Ghosttown
"""""""""""""""""""""""""


10 Täg in Hanoi si auso definitiv gnueg gsi u so hei mir im neue Jahr aus ersti Destination grad mau dr wohl bekanntischt Ort in Vietnam agstüret; Halong Bay. Mit ere Tagestour hei mir e flotti Bootsfahrt dür die wunderschöni Bucht mit de 1'969 (!!) Insle dörfe mache.

Die ganzi Halong Bucht isch aber, entgäge de Ussage vo diverse angerne Reisende, fasch wie usgstorbe gsi.
Schiins chöme ou während dr Hochsaison nid viu meh Lüt a dä Ort. (??) Trotz de offebar niedrige Touristezahle, löi sechs
aber d'Bauherre dert unger nid lo näh, eis Hotel nach em andere z'Baue. D'Stattmitti gseht us wie 1 riisegrossi Baustell.

Näbe de zahlriiche Hotels und Hüser si ou no 3 Vergnüegigsparks am entstah. Leider hei mir dert no nid inechönne und üs isch
nur s'Riserad (isch würklech Risig gsi) zur Verfüegig gstande sowie en Spielhalle, wo mir üses Gäut bim Airhockey, Kranfische und Basketball verbrate hei.

S'Highlight vo üsem 4 Tägige Ufenthalt isch aber definitiv dr Stop im Homestay vom Hung (Höng) gsi, am ne ehemalige Fuessballkolleg vom Sti.
En eigete Pool, fantastischs ässe, e Art Zoo (dä Typ het 5 Hünd, 8 Chatze, X Hüehner), e riiseschöni Wohnalag hei mir während de letzte 2 Täg
in Halong Bay für üs elei gha. Düre Hung hei mir de bi viu Bier und andere Stimmigsmacher viu über d'Halong Bucht und Vietnam dörfe erfahre.

Hie uf alles izgoh würdi definitiv dr Rame spränge. Göit doch eifach säuber mau verbi wenn dir dert unge sit. Isch auso sehr z'empfähle.


Das isches de ou scho gsi vor Front eeeh, Bucht u so schliesse mir s'Buech wider mau für es paar Täg.


Aktuell si mir ize im liecht rägnerische, aber wunderbare Ninh Binh, vo wo es de i de nächste Tag witter i d'Mitti vo Vietnam geit.
Dong Hoi, Hue und Hoi An stöi aus nächsts ufem Plan. In Hue wärde mir de wahrschiinlech ou d'Halbziit vo üsere Asie-Reis chönne iilütte.

Das wird de ämu de ordentlech gfiiret - seid gespannt :)


So long, euchi 2 Superfründe

Tobi & Sti




Hallo Zäme


Lang isches här u viu Sache si passiert sit das mir euch s'letschte mau vo
üsne Abentüür hei chönne verzelle. Mir hei mittlerwiile Thailand hingerüs gla und
si dür halb Myanmar greiset.

In Chiang Mai hei mir die wittere Täg no mit em Yves und dr Claudia verbracht u si
am Obe nach üsem letschte Blogiitrag die berüehmt berüchtigti "Cabaret Chiang Mai" Show
go luege. Mit nid würklech grosse Erwartige si mir am früeche abe in richtig Cabaret ufbroche.

Die ganzi Show (wo übrigens jede Abe ir Wuche louft) isch restlos usverchouft gsi
u es het vo 10-90 Jährige alles an Volk derte gha. Während 1,5 Stund het sech das chliine
Zält ine Party- und Show Hölle verwandlet. E Wahnsinns Darbietig mit mehrheitlech Transsexuelle Tänzer(-inne?)
het sech üs botte, d'Showacts hei mit de Gäst tanzet, gfiiret u umeblödlet. Ganz am Schluss
het de dr Tobi zäme mit 10 angerne Nase aus Fraue verchleidet no e Tanziilag uf dr Bühni dörfe gäh.

Gschlosse hei mir gfunde, dass das (bis ize) wohl s'Highlight vo üsem Thailand ufenthalt isch gsi.
Für alli wo mau in Chiang Mai si, dene legge mir die Show unbedingt as Härz!

E Tag später hei mir üs mau chlei im Wasser weue vergnüege u dr Yves het üs e Tag im ne Wasserpark
buechet. Bi knapp 35 Grad si mir am Morge mit em Taxi in Richtig Grand Canyon ufbroche.
Dr Wasserpark säuber isch gsi wie ne riisigi Hüpfburg ufem Wasser. Rutschig wie Sau aber e riise Spass
machts uf dene Gummidinger umezrenne und nanger is Wasser probiere z'katapultiere. Uf aues ufe si mir de
no öppe die einzige Gäst im ganze Park gsi. Wär sech nid ganz cha vorstelle wie ize dä Wasserpark het usgseh,
dä seu entweder s'Fottis luege oder sech mau e Tag lang "Takeshis Castle" inezieh. Mir hei üs wider wie Ching gfüeut.

Am nächste Morge hei mir üs de schweren Herzens vom Yves u ar Claudia müesse verabschide u hei üs de witter
in Richtig Pai ufgmacht. Pai isch es chliises, verschlafnigs Hippie-Stättli ganz im Norde vo Thailand.
Da sech d'Lüt ufgrund vor Grössi vor Stadt au mehrmals pro Tag übere Wäg laufe, het dä Ort e ganz familiäri Atmosphäre.

Üses Hotel isch vo ne Kanadische Hockeyfan gfüehrt worde, wo sechs nid het lo näh ou bi durchschnittlech 30 Grad
sire lieblingsmannschaft nachezfiire. So hei mir dr erst Abe de grad mou mit em luege vo es paar Hockeymatch verbracht.

Ir Main-Road wimmlets vo gmüetleche Bars wo sech teilwiis am Abe in chliini Clubs verwandle und so ou ir Nacht no
zu gmüetlechem Techno, Rock oder Pop cha tanzet wärde. Am Public Pool versammle sech düre Tag jensti Lüt zum
Bier trinke, abhänge und ja, sogar zum kiffe. Pai schiint so chlei öppis wie dr Tod Winkel vo Thailand z'si.

Da üs s'Biertrinke de schnäu mau verleidet isch, hei mir üs de doch no zum ne 2 Tages-Trekking müesse zwinge
u si während 48 Stund düre töifst Dschungel vo Pai gwanderet. Fernab jeder Zivilisation, si mir am erste Abe
im ne Dörfli, na ja, bi knapp 5 Iiwohner, e wunderbare 3 Gänger (Maden, Gemüse, frittierte Maden) go gniesse.

Wär gmeint het, Gächliwil sigi es Kaff, dä isch no nie in Pai im Outback usse gsi.

Dr Huusbrönnt Whiskey het üs de am 19:00 am Obe gholffe ou ir gröbste Bambus-Barracke ufem Bode chönne z'schloffe.
Da dr Tobi wider mau dr einzig isch gsi wo chlei öppis studiert het bevor mr si ufbroche, isch är dr einzig
mit em ne warme Schlafsack gsi u het aus einzige e töife Schlaf chönne gniesse. (ätschbätsch).

Dr einzig isch zwar nid ganz korrekt. Eine vo üsere Gruppe het no dörfe Opium mit em ne Dorfbewohner rouche u het
nachdäm gloub ou nid allzu schlächt chönne relaxe......well done Nico! :)

Am zweite Tag hei mir nachere Wunderbare Duschi (Rägetonne mit Chessu drinne, knapp 10 Grad warm) no dr räst vo de
Kilometer abgspuelet u si am spätere Nachmittag wider im wohlbehüetete Pai acho.

U so si de us afänglech 3 Täg in Pai de grad schnäu mau 10 worde bevor mir de Thailand leider scho wider hei müesse verlah.

Mit em Mini-Van hei mir dr Transfer zrugg uf Chiang Mai a Flughafe vorgno. Mir hei üs während dr Busfahrt grad e chlei
wie im Bus vom letzte Butterlan Hälferässe gfüeut, die halbi belegschaft het d'Papiersäck rückwärts mit Ässe gfüllt.
So isch de ou s'Duftbäumli im Auto nümme würklech nötig gsi.

E wunderbari Erinnerig zum mitnäh wo mir Thailand verlah hei.



Kapitel 2 - Herzlich Willkommen im Land der Bars & Parties: Myanmar
""""""""""""""""""""""""""""""""""""""""""""""""""""""""""""""""""""""""""""""""""""""""


Nach knapp 30 Täg Thailand isch de Myanmar ufem Plan gstande.

In Yangon acho hei mir festgstellt, das es ussert ere Risige Pagode i dere Stadt genau gar nix zum mache git.
Kes Problem hei mir dänkt, de vergnüege mir üs de am Abe jewiils chlei i de Bars und Clubs. Weli Bars & Clubs zum Geier?!?

D'Burmese göi schiins aui immer sehr früeh is Bett u so isches de ou gsi, das am ne Samschti Abe ab de 21:00 Uhr nix meh göffnet isch gsi. Dr heilig Gral z'finde wäri glaub eifacher aus in Yangon e Bar z'entdecke. Für zuekünftigi Yangon-Bereiser, max. 2 Täg
dere Stadt si meh aus gnueg. S'Iichoufszenter ir mitti het öppe no am meiste Action z'biete.

Mit de Närve wo chlei blank si gläge hei mir üs de schnäu zum wohl berüehmtisti Ort in ganz Myanmar ufgmacht; Bagan - Dr Ort mit de 1000 Pagode.

In Bagan acho, knapp 2 Stund vor Ort und......Überraschung, wär hei mir in Bagan troffe?


....dr Yves und d'Claudia :)


mit Freudeträne oder so öppis ähnlechem i de Auge hei mir ihre letzt Tag no zäme verbracht u si mit de Elektro-Scooter zu de unzählige Temple gfahre. Uf eine vo de Pagode obe hei mir de zäme dr Sunneuntergang chönne gniesse. Da mir ou am nächste Tag wider s'gliche gmacht hei - git ja nix anderes hie, hei mir de scho bald chlei gnueg vo Bagan gha.
Die ganze Pagode si zwar schön, aber es si haut ou nume Pagode.

D'Schwiizerwuche isch dodüre abgrundet worde, das mir am letzte Tag im Hotel e witteri einsami Seele usem Buechibärg hei troffe. Sache gits :)


Mit em ne kotzefreie Mini-Van si mir am nächste Tag in Kalaw iitroffe. Zäme mit em ne schwiizer Päärli (Beryl und Stefan) hei mir üs grad schnäu mau zum ne Hardcore-3-Tages-Marsch in Richtig Inle-See la überschnurre. So si mir in Kalaw ou nur 2 Täg gsi bevors mit dr Hardcore-Wandertruppe, bestehend us de 4 Jodler em belgische Evil Jared (Gil) und ar Laurence is 75 Kilometer entfernte Inle isch gange.

D'Übernachtige i de Bambus-Barracke und die komfortable Wasserbottich-Dusche hei mir ja scho kennt u zmingscht i dere Hisicht kei überraschig me erläbt. Nach 3 Täg ohni richtigi Duschi und ohni WC hei mir üs, in Inle acho, gfüeut wie nach 4 Täg Openair. Mir si auso beidi chlei a üsi gränze cho.

Da üsi Wandertruppe so guet harmoniert het, hei mir die wittere Täg in Inle de jewiils ou no zäme verbracht und hei es ziemlechs Programm abgspuelet. E wunderbari Bootstour (6 Stund ufem ne blöde Boot), chlei go Wii trinke (schmöckt nach Waschmittel) und diverse Velousflüg (Sti mit em ne Velo vo Satan persönlech) hei die Täg in Inle zum ne wunderbare Erläbnis gmacht. Inle het auso sehr viu z'biete; wunderbari Natur, sehr gueti Restaurant e schöne See und sogar e Bar (juhui).

Dr Gil und d'Laurance si de am letzte Abe in richtig Bagan ufbroche. So si mir leider wider mit de 2 Zürcher ellei gsi.
Zu üsem Glück hei die zwöi wenigstens chönne Jasse :) :)

Mit Kotz-Tours (80% vom Bus) isches de in 20 Stund jassend witter nach Hpa-an gange. Wo mir witteri Tagesusflüüg zäme hei ungerno. D'Beryl und dr Stefan hei üs de churz drufabe füre Golden Rock und Yagon (hä hä) verlah.

So hocke mir ize wider ellei hie und schribe euch vo üsne Erläbnis. Morn geits zrugg nach Yangon wo mir no einisch en Tag mit de zwöi Schwizer wärde verbringe, bevors für si nach knapp 1 Jahr reise zrugg uf Züri und für üs witter nach Vietnam geit.

Beryl und Stefan, wenn dir das läset, mir hei e wunderbari Zit mit euch gha und freue üs scho ize wie Sau euch in Yangon bim Jasse wider abezloh :)


Myanmar säuber wärde mir mit chlei gmischte Gfüeu verlah, am Sti hets einigermasse gfalle, am Tobi nid würklech.

Da sicher s'Internet in Vietnam wider besser wird si, verspräche mir euch wider regelmässiger z'blogge.
Mir hoffe dir bliibet üs treu und verfolget no die rästleche 5 Mönet vo üsere Reis.


So long, euchi 2 Superfründe....


Tobi und Stivi


PS. no donation for cleaning!




 

Ni hao Zäme

Nach guet 1,5 Monate hei mir auso China hingerüüs glah und si witter richtig Hong Kong und Macao.
Bevor mir euch aber über die 2 Destinatione öppis verzelle, gits a dere Stell no e chliini Zämefassig über Land und Leute vo China.

- Chinese mache nach wie vor viu Fottis vo Europäer, ob d'Europäer wei oder nid.
+ Derfür si dr Iitrit und Getränk für Europäer i de meiste Clubs gratis.

- S'Bstelle vo ässe und trinke i de Restaurants isch zu 90% Trial and Error prinzip.
+ Derfür ischs Zug, Bus und Flugzüg reise extrem eifach und unkompliziert.

+ S'ässe isch dr Wahnsinn
- Nachdäm me mau die erste 2 Wuche permanent ufem WC isch ghocket bis sech dr Mage dragwöhnt het.

- Chinese trinke sälte Alkohol
+ wenn si mau trinke, de richtig (blöds Würfelspiu)


Entgäge aune üsne Erwartige und Befürchtige, ischs Reise dür China absolut eifach und wenn me sech nid grad querstellt und chlei d'Auge offe het chöi ou Sprachbarriere eigentlech ganz luschtig si. Mir chöi China auso aune Reisende wärmstens witterempfähle. Wunderschöni Landschafte, grossi Städt u wenn me sech mau chlei a d'Kultur und Sitte gwöhnt het, wo haut für üs nid immer verständlech si, si d'chinese ganz es agnähms u hilfsbereits volk.


So viel dazu - Hong Kong steit ah.


Nach ere churze, riibigslose Reis, si mir auso in Hong Kong acho. Was seu me da säge, ize wüsse mr ämu was e Kulturschock cha si.
Me steu sech vor, 1,5 Monat günstig, ruehig und mit diverse restriktione im Rücke umegreist u när chöme mir ire Stadt ah wo so öppis wie dr "Tod Winkel" vo China isch. Aues was in China verbote etc. isch cha me auso in Hong Kong mache und erläbe. E riisegrossi Stadt mit gfüeut einer Million Leute, sehr enge Strasse und überall Gucci, Prada, Stores mit 1000 Liechter und Reklame a de Gebäude - e ziemlechi Reizüberfluetig im erste Moment. Na ja, viu me ussert Party und Shopping gits in Hong Kong irgendwie nid würklech.

Da mir ja s'Gäut hei, hei mir üs grad mau im ne luxuriöse 4 qm zimmer niderglah. Dr Sti het vor mitti vom Ruum us alli 4 Wänd chönne berüehre :) Dusse permanent 30 Grad mit 80% Luftfüechtigkeit hei mir s'Glück gha das üses Luxusappartement über ne Klimaaalag verfüegt.
Temperaturiistellig isch möglech gsi zwüsche "Wüste Gobi" und "Nordpol". Wenn mir no länger dert wäre blibe hät mir es Eishockey Fäld chönne eröffne.

Da üsi lobby (weli lobby?) us SIM-Charte läde und süschtigem Schrott bestande het hei mir üs ou dert nid würklech weue ufhalte. Irgendwie si bi üs permanent 100 Inder u Afrikaner verchert wo dr vo Uhre, Droge, Azüg, und natürlech SIM Charte öppe aues hei weue verchoufe.
Mir wüsse auso nid wieso au Touriste immer bös über die Rede, e Rolex isch viu günstiger aus im Lade we se vo som ne Typ choufsch....tststs

Somit hei mir natürlech die meisti zit uf dr Strass resp. i de Bars verbracht. Dank de Ängländer wo ja bis vor churzem ou no chlei Mitgredet hei in Hong Kong, hei mir hie nach 1,5 Monat abstinenz wider mau e richtigi Pub und Bar Tour chönne mache.

Am nächste Tag, usgrüstet mit em ne neue Azug, 2 Rolex Uhre, ca. 1 Kilo Koks und 20 SIM Charte si mir no chlei go wandere u hei vom Victorias Peak us üs mau e überblick über Hong Kong verschaffet. I knapp 20 Jahr wärde si äuä de ou no dr letzt Fläck vor Insle verbout ha, das geit ab mit Boue hie.

Zuesätzlech hets während üsem Ufenthalt no e Gondelfahrt zum Grosse Buddah gäh. Zu üsere überraschig hets uf däm Bärg sogar freilaufendi Chüeh gha. Do füehlt me sech doch grad wider wie deheime. Dr Sti het sogar chlei Heimweh becho und unbedingt es Fotti mit somne Vieh weue mache.

Abgseh vo dene 2 sportleche Täg hei mir üs meh oder weniger würk nur i de Bars und Restaurants bewegt. Mir hei e Franzos kenne glehrt wo üs während 2 Stund immer wider druf ufmerksam gmacht het, dass die Frou näbe ihm sini Chinesischi Frou sig (mir gloube är isch chlei stolz druf gsi). 2 lustigi Barkeeper wo dr Tobi am 2. Abe grad mau verwächslet het - verdammt und mit diverse angerne Touriste hei mir üs mehrmals dürs Bierangebot trunke.

#auaimkopf


Nach 4 Täg Hong Kong (mehr als genug) hei mir üs in Richtig Macao ufgmacht wo mirs üs während 4 wittere Täg mau so richtig hei la guet gah. Uf Booking.com mau churz nach em tüürste 5 Stärne Hotel gsuecht und let's go, si mr is Grand Hyatt Macao inegjodlet. Näbe usdehntem Spa und Wellness ufenthalt hei mir üs eigentlech nur zwüsche Bar und Casino bewegt u hei hie und da mau chlei Gäut la ligge - viu meh cha me in Macao eigentlech gar nid mache.

Fantastisch gässe, guete Wii trunke und komplett relexed. Elei üses Bad im Zimmer isch knapp 3x so gross gsi wie üses ganze Zimmer in Hongkong :)

Nach 2-3 Täg verluste im Casino hei mir us üsem letzte gäut (knapp 12 CHF) mau churz 220.- gmacht u si mit däm ize ir Lobby am Z'Morge ässe und Tee trinke. Fürs Taxi richtig Flughafe längts sogar ou no.

Die nächste Täg wirds de mau wider chlei meh Action gäh. Mir Flüge hüt am Abe richtig Bangkok und Ko Tao in Thailand. Unteranderem wärde mir dert ou ufe Yves und d'Claudia vo heuteruhetag.ch träffe und de knapp 1 Wuche zäme in Chiang Mai umereise. D'Vorfreud isch auso scho riiiiisig.


Mir hoffe dir bliibet üsem Blog treu und heit so viu spass bim läse wie mir bim schribe?!


So long, euchi 2 Superfründe
Sti & Tobi

 

Seite 1 von 3

© 2017 Your Company. All Rights Reserved. Designed By WarpTheme